Балаларны яклау көне котлы булсын!

Җир йөзендәге барлык балаларны әлеге бәйрәм белән котлыйбыз. Барыгыз да сәламәт һәм бәхетле булыгыз! Күңелле балачак һәм матур киләчәк телибез! 
Зәңгәр ил – балачак иле
Туган илем – илләр иле,
Туган җирем – җирләр җире, −
Бәхет җире, нур җире.
Мәңге яңгырар җыр иле,
Әйдә җырлыйк яңа бер җыр:
Илемдә бар иң матур ил,
Исеме – Балачак иле.
Ямьле Балачак иле,
Зәңгәр Балачак иле,
Аяз күгең, якты көнең, −
Кем генә белми сине?!
Җилләрнең иң-иң җылысы
Исә синдә, зәңгәр илем!
Гөлләрнең дә иң гүзәле
Үсә синдә, бәхет иле –
Хыяллар һәм чынлык җире!
Татулык, Дуслык, Туганлык,
Матурлык, Сафлык, Уңганлык –
Байрагыңда шулар синең,
Зәңгәр күкле Туган илем!
Серләр тулы – утрау түгел,
Әкиятләр күп – тормыш үзе,
Бакча кебек – төрле төсле
Матур ил – балачак иле!
Бу илдә үткән балачак
Җыр булып әйдәп барачак:
Ямьле Балачак иле,
Зәңгәр Балачак иле,
Аяз күгең, якты көнең, −
Кем генә белми сине?
                 Рәдиф Гаташ