Бүгенге көндә яшәүче кошлар арасында пингвиннар — суда яшәүгә тулысынча җайлашканнары. Аларны кошлар дөньясының тюленьнәре, ягъни су этләре, дип әйтерлек. Пингвиннар әкияттә генә түгел, тормышта да иң кызыклы тереклек ияләренең берсе икән.
* Пингвиннар, кош дип саналуларына карамастан, оча белмиләр. Аның каравы, бер дигән йөзәләр.
* Пингвиннар гомерләренең яртысын коры җирдә, икенче яртысын океанда үткәрәләр.
* Аларның барлыгы 18 төре бар. Иң зурысы – император пингвины. Аның озынлыгы 120 смга җитә, диләр. Ә авырлыгы – 40 килограммга. Иң кечкенә пингвин исә кешенең тезеннән генә була. Авырлыгы да нибары 2,5 килограмм.
* Пингвиннар Антарктида, Яңа Зеландиядә, Австралиядә, Көньяк Африкада, Көньяк Америкада, яр буйларында яшиләр. Балык, кысла белән тукланалар.
* Пингвиннар үзара бик дус булып саналалар. Меңләгән пингвин бергә көн күрә. Әмма нәрсә кызык – пингвиннар бер-берсенең оясыннан йомырка урларга яраталар икән. Шуңа күрә йомыркадан бала чыкканчы әти пингвин белән әни пингвин аны чиратлашып саклыйлар.
* Җылыныр өчен пингвиннар бер-берсе янына җыелалар. Алар арасындагы температура тышка караганда 40-45 градуска югарырак булырга мөмкин. Җылылык барысына да җитсен өчен, кошлар, урыннарын даими рәвештә үзгәртеп торалар.
* Карга батма өчен, пингвиннар корсакларына яталар һәм канатларын этеп, чаңгычылар кебек шуышалар. Бу ысул белән алар шактый тиз хәрәкәт итә алалар.
* Пингвинның тәпиләре салкынны сизмиләр, чөнки анда нерв күзәнәкләре бик аз.
* Әлеге кошлар -60 градус салкында да яшәргә сәләтле. Мондый салкынлык башка тереклек ияләренең күпчелеген бик тиз үтерә.
* Гадәттә, бу кошлар табышны суның өстеннән эзлиләр, ләкин кирәк була калса, алар 100-200 метрга кадәр тирәнлеккә чума алалар.
* Су астына тирәнгәрәк төшү өчен пингвиннар таш йоталар.
* Барлык пингвиннар да Антарктидада яки Көньяк ярымшарның ачык диңгезенә якын булган салкын климатлы территорияләрдә генә яшәми. Экваторда диярлек урнашкан Галапагос утрауларында галапагос пингвиннары яши. Биредә ел әйләнәсе су температурасы 22-24 градус, ә һава температурасы - 18-28 градуска кадәр җитә.
Comments: