Сезгә ШАЯН тамашачыларыбызның кыш турында иҗат җимешләрен тәкъдим итәбез!
Менә кыш үзенең чын матурлыгын, үз вазифаларын күрсәтеп тора. Урамда салкын саф һава. Кыш ап-ак юрганы белән өй башларын һәм җир өсләрен ябындырды. Елгадагы шома боз өстендә дә кар ята. Кыш көне, бигрәк тә авыл балалары, урамда уйнарга яраталар. Быел Шыкча авылы уртасында искиткеч чыршы куйдылар, аны тантаналы рәвештә бөтен авыл белән ачтылар. Балалар тау башыннан чаналарда, чаңгыларда шуалар, ә иң яраткан шөгыльләре - шома боз өстеннән тимераякта шуу. Арып кереп эссе чәй эчү – үзе бер рәхәтлек. Тәрәзәгә карасаң, андагы матур рәсемнәр күңелне күтәрә. Мин кышны бик яратам, чөнки анда шатлыклы мизгелләр күп.
Илзидә Калбаева
Ап-ак кар бөртекләре тантаналы рәвештә әйләнәләр, алар бүген бәйрәм итә. Аннан соң әкрен генә күбәләкләр шикелле җиргә куналар. Кыш үзенең ак келәмен җәйде, быел ул бигрәк тә калын булды. “Кар күп булса, икмәк тә күп була”, - ди халык. Чыннан да бу бит шатлык. Минем җимлегемә быел кунакка кызылтүшләр еш килделәр, ипи валчыкларын, ярма, миләш җимешләрен яраттылар. Урман-кырлар өстендә кышкы тынлык, кар өстенә төрле кошлар, кыргый хайваннар эзләр калдырып киткән. Чаңгы шуганда без ул эзләргә карап үттек. Тыныч, уңышлы һәм бәхетле еллар гына булсын!
Зөлфия Баязитова
Дуслар, сез дә безне үзегезнең язмаларыгыз белән таныштырып, хатлар юллый аласыз! Без аны үзебезнең рәсми сайтыбызда урнаштырырбыз! Хатларыгызны [email protected] почтасына җибәрегез!
Комментарии: